今個星期泉叔 王鎮泉Jeoffrey 繼續為觀眾送上電影資訊，剛剛呢個禮拜電影業迎嚟一個非常震撼嘅消息，就係Paramount Skydance自從擊敗Netflix等等幾間競標對手，排除咗反壟斷嘅審查障礙後，終於成功收購華納兄弟探索集團，以1100億美元完成呢次世紀合併。
最令人估唔到嘅係，首席執行長David Ellison隨即宣布，paramount同華納兄弟探索集團將會統一改名做Skydance影業，即係話大家將來就唔會再見到呢兩個咁經典嘅片廠logo喇，跟住落嚟，係時候睇吓今個禮拜嘅新片速遞喇。
另外，上年一套動畫電影Kpop獵魔女團，成功刀仔鋸大樹，已經斬獲超過5.4億小時嘅瀏覽量，連帶裡面嘅歌曲亦都非常受歡迎，當然Golden呢首歌更加係紅爆全球兼且橫掃好多音樂獎項啦。
製作公司當時已經宣布會有一連串嘅後續製作計劃，實行開拓一個Kpop Demon Hunter宇宙，而最新消息就係，佢哋已經決定今次開拍續集電影將會先大規模喺戲院上映，而唔係單單喺串流平台播，相信影迷一定非常期待可以喺大銀幕度睇到呢隊女團喇，呢個時候，不如睇吓今個禮拜香港票房龍虎榜先啦。
本周電影新片速遞：
《社交清算》：作為《社交網絡》（The Social Network）姊妹作，電影由真人真事改編。講述年輕 Facebook 工程師 Frances（米姬麥迪遜飾）喺工作中意外接觸到公司刻意封存嘅黑暗秘密，為咗公義，佢搵嚟記者 Jeff（謝洛美亞倫韋特 飾）幫忙，兩人展開一場隨時玩命嘅吹哨之旅，目標只有一個，就係向全世界揭開社交媒體巨人最不可告人嘅黑幕同真相！
《實境誘捕》：新聞節目主持人 Chris Hansen（羅拔柏迪臣 飾）同製作團隊構思咗一項前所未有嘅「實境誘捕新聞節目」：團隊成員喺網路上放蛇假扮未成年少男少女，吸引專門喺網上誘騙兒童嘅疑犯前往早已裝設隱藏鏡頭嘅住宅赴約。Chris仲會帶住攝影機突襲現身同嗰啲疑犯現場對質，並配合警方進行即場逮捕。節目收視率一飛沖天，但以隨即捲入一個新嘅漩渦之中。
《衣櫃裡的媽咪》：故事圍繞Bela同家中一個詭異存在之間嘅不尋常關係，嗰個存在嘅容貌竟然同佢嘅媽媽一模一樣樣，但佢嘅眼神、語氣、渴望，全部都透露住非人嘅寒意。當「另一個媽媽」步步進逼，Bela同家人嘅黑暗之旅先
至啱啱開始。
《留家靈》：傳說中，有一種馬來民間的世襲家族巫術—靈僕。靈僕聽命於契約主人，替其消災解厄，但一切皆有代價。梅羅為咗保護年幼嘅小朋友，無奈繼承家族靈僕。後來怪事連連發生，家人性命岌岌可危，惡鬼僕匿匿，佢已經無法再離開呢個家。
本周電影龍虎榜，截至10月7號中午，第1位《生化危機》、第2位《狂野雄心》、第3位《空槍》
