隨住TVB處境劇《愛‧回家之開心速遞》落幕後，龍家多年陪伴已經長埋觀眾心中，但10月8號大龍生羅樂林因獲得TVB「傑出員工獎」，龍家二太蘇恩磁、三太樊亦敏、大小姐林淑敏、「送水輝」許家傑及「Joe少」何晉樂，嚟個龍家合體支持，並預祝大龍生日快將踏入79歲生日，令似曾相識嘅場面重現觀眾眼前。
忙住開拍《愛．回家之三代同糖》嘅阿仔Terry雖然未有現身，但佢一向戲裡戲外都好孝順爸爸，知道大龍生攞獎，特別親筆畫咗幅大龍生嘅Q版肖像畫作送俾爸爸做賀禮，畫中嘅大龍生打招牌煲呔、穿上西裝，以粉色系列為主好醒神，勾畫五官嘅神緒細緻，Terry仲留言話：「今次真係龍咁威，龍爸爸今日攞傑出員工獎，畫幅畫恭喜佢先。」唔少網民見到都大讚Terry畫功一流，簡直係愛回家之光。
