為紀念新馬師曾（祥哥）誕辰110周年，新馬派徒弟及徒孫特別舉辦《紀念新馬師曾誕辰110周年好友演唱會》，廣州站於8月2號順利演出，而香港站於10月9日於高山劇場舉行一連兩場。祥哥徒弟曾慧、彭熾權及黎駿聲，以及徒孫司馬祥、劉麗、陳覺同鄭靄玉上台表演外，仲與祥哥亦師亦友嘅陳飛龍罕有參與演出，更邀請得祥哥大仔鄧兆尊出任特邀嘉賓客串做司儀，而祥哥愛女鄧翠玉同細仔鄧兆榮亦有到場欣賞。
當晚演出前，大會率先舉行由新馬派嫡系傳人、祥哥徒弟曾慧、彭熾權同黎駿聲成立以傳承新馬派藝術為宗旨嘅「新馬師曾傳人聯誼會」舉行委任儀式，三人向鄧家子女兆尊、翠玉及兆榮派發委任狀，邀請佢哋出任聯誼會顧問。三位徒弟再聯同一眾徒孫及表演者，演繹祥哥多首名曲及演出折子戲，客串司儀嘅兆尊以一貫風騷幽默風格，提到點解唔繼承衣鉢，原來同紥頭有關，「我做過好多套戲，由冇對白到有對白都試過，其他嘢可以偷雞，但係紥頭要不斷扯住咁紥，真係太辛苦啦」。
當晚曾慧先跟陳飛龍合唱《珍珠慰寂寥》，之後再與徒弟司馬祥拍檔演出祥哥名劇《仕林祭塔》折子戲。慧姐表示為紀念恩師祥哥籌辦三地演出，透露10月澳門站已籌備得如火如荼，陳飛龍熱愛粤曲，猶其愛演唱祥哥作品，更視祥哥如師如父，鄧家子女對飛龍哥極為尊重。飛龍哥對於祥哥嘅藝術同為人亦讚不絕口，身旁一同接受訪問嘅兆尊，對於飛龍哥演繹亡父作品相當欣賞，翠玉讚飛龍哥對亡父好有心：「飛龍哥好鍾意爸爸，阿爸一有時間去佢屋企練歌，飛龍哥就會好似個小朋友咁好專心聽，阿爸又會每句咁去教佢，飛龍哥都會做到出嚟。」
飛龍哥還主動透露另一件開心事，就是徐蓉蓉撰寫的《千面伶王 — 新馬師曾》一書，已「進駐」泰國總理府，「我送咗兩本書畀桌球手『白旋風』韋特（Jimmy White），泰國總理（陳錫堯）係佢fans，英國讀書時經常睇佢打枱波，所以請佢去總理府食飯，我就同韋特講佢係中國人後裔，爸爸一定係祥哥嘅fans，不如你攞本書送畀個總理啦，果然送咗畀總理佢開心到不得了，仲畀咗佢爸爸，就嚟總理府要訂書」。
兆尊聽到喜訊非常開心，「直情係好激動，Jimmy White都係我偶像嚟，佢又係飛哥嘅好朋友」，翠玉好高興謂：「阿爸真係好叻，有華人嘅地方就有人識得佢啦！」祥哥桃李滿門，藝術成就亦傳遍全球華人，兆尊坦承任重道遠，於演藝界工作要做得更好，「我不嬲係肩負住呢個責任感喺度，有呢個家族背景，都要安份守己咁去做，但會放鬆自由自在咁做，唔需要太過拘謹，最緊要跟住初心做好每個工作」。
