澳門上葡京綜合度假村呈獻《璀璨之城》將於10月12號首播，劇集喺澳門著名景點大三巴、十月初五街、新馬路金碧坊等實景拍攝，靚人靚景吸引觀眾。呢日全劇演員登場宣傳 張智霖、 吳卓羲、 高海寧， 張曦雯、 姜大衞、 江美儀、 陳煒、 陳曉華、 陳瀅、 周志康、 蔣家旻 等齊齊現身劇透角色。
劇集圍繞家族權力鬥爭，歴盡人性醜惡，Chilam同Ron展開明爭暗鬥，兩人都話劇集出街時預咗俾人鬧爆，喺記者會上兩兄弟已率先鬥嘴，Chilam大爆Ron好色，兩人齊叫觀眾睇劇後評評理。
Ron同Kelly因為合作劇集而傳出撻着相戀，兩人首度同場，又默契十足齊齊送心心好Sweet咁，獲得大家嘅祝福。不過佢哋對拍拖一事就口勁一致話，想知佢哋係點要睇《璀璨之城》，Kelly則甜笑表示可以同Ron、Chilam合作當然開心，依家大家都估緊佢哋係咪一齊，睇劇就知道，Ron則接住話要留啲玄念俾大家。
Chilam今次嘅大反派角色挑戰佢演藝生涯極限，同佢飾演一對嘅高海寧就見證住Chilam成魔之路，仲話Chilam平日係一個好友善健談嘅人，但一埋位就被對方嘅氣場震懾住。
Chilam 19歲大嘅兒子張慕童，近日接連跟住老豆開騷吸收經驗，Chilam好支持阿仔嘅發展，覺得要因材施教，阿仔對音樂好有興趣，知道佢開騷自己向音樂監製自薦通過咗，就俾佢試吓，而且Chilam正舉行巡迴，佢都想阿仔喺佢身邊，依家仲可以一齊演出就更加開心。
陳曉華今次飾演陳瀅上司，兩位分別喺劇中都會有前所未有嘅演出，一個就火辣，一個就柔情似水，Hera喺第一集已經會令人睇到㷫恰恰。
