TVB劇集《死有對証》喺10月9號晚大結局，吳若希 飾演單佩嘉嘅死因，喺 陳曉華 飾演嘅程芷昕追查下水落石出，知女友為自己而犧牲嘅詹柏宇( 阮浩棕 飾)，獲准喺拘留期間出席女友喪禮，而拍攝呢幕告別戲時，阮浩棕非常感觸，投入角色爆喊收唔到聲，連瞓喺棺材嘅Jinny都話感受到震動。
Jinny接拍呢套劇收到最多利是，因為要不停演被殺同死屍戲份，但係佢就好滿意自己演技，仲話由第一次演死屍，試過拍佢死後，Hera喺身邊說話，佢好想回應，覺得自己唔夠專業，容易影響對手，最後一場戲做死屍就有好大進步。
陳曉華喺喪禮上嘅戲份，令觀眾有所感悟，而首次瞓棺材嘅Jinny都話呢套劇畀咗好多啟發佢，記得之前去到墳場拍攝，見到好多骨灰龕，有老人家、有BB，覺得人生無常，要好好珍惜。