許志安紅館除衫大騷麒麟臂 陳奕迅爆初入行秘事兼力撐：佢冇跌出過三甲

許志安相隔11年再次踏上紅館舉行一連三場演唱會，全場觀眾爆滿。安仔呢晚獻唱多首耳熟能詳嘅金曲，令歌迷勾起集體回憶，並感激樂迷多年嚟支持，成就佢一個美夢。

頭場嘉賓搵嚟Eason陳奕迅，一齊合唱《幸福摩天輪》，兩把靚聲令觀眾聽得如痴如醉，Eason話安仔喺佢心目中，一路冇跌出三甲嘅歌手，又憶起自己入行不久到錄音室，撞見安仔錄《男人最痛》隻碟，以為要好長時間，點知個幾鐘後安仔就話錄完搞掂，令佢當時好驚嘆。Eason希望安仔餘下嘅場數繼續享受舞台。

為咗開騷，安仔又操得一身弗爆身材，喺勁歌環節當然要派福利騷麒麟臂載歌載舞，將全場氣氛升温齊齊起動，尾聲唱出《一千次日落》時，安仔不禁感觸落淚。