吳卓羲（Ron）與張曦雯（Kelly）喺新劇《璀璨之城》飾演兩公婆，傳二人戲假情真譜出浪漫戀曲，早前出席宣傳活動，二人未有否認戀情，笑笑口話想單獨約會，亦準備好迎接新戀情，盼望外界給予空間，點知今日劇組釋出一條拍攝花絮，揭吳卓羲疑似「心有所屬」噃。
型男吳卓羲與女神Kelly呢一對緋聞情侶，一眾網民非常受落，更撥行大葵扇，甚至希望二人拉埋天窗，之不過今日上載嘅幕後花絮，片中見張智霖一臉認真，要求劇中嘅家族成員交出手機，誓要查出內鬼！
百厭嘅吳卓羲原來設定咗自己手機wallpaper係同劇老友江美儀嘅超大頭相，眾人一放低電話，張智霖見到張圖即忍唔住笑：「你係要擺江美儀嗰張喺度。」吳卓羲隨後笑著解釋呢張相係二人喺大三巴開工嗰陣，佢親自幫江美儀影嘅，該相見江美儀斗雞兼瞪大鼻窿望向鏡頭。
向來玩得嘅江美儀亦喺社交平台幽默咁回應吳卓羲嘅厚愛， 同時不忘為新劇宣傳，「你哋攪錯曬啦，吳卓羲其實係暗戀我㗎🤣🤣🤭🤭 星期一晚8點半無綫電視翡翠台『璀璨之城』」。
