韓國天團BIGBANG一連三日喺台北大巨蛋開騷，頭場GD、大聲同太陽唱跳全晚，令全場4萬歌迷high爆。天王周杰倫除咗送上花籃，更帶埋太太昆凌親自到場睇騷支持，周董事後喺社交平台post出同BIGBANG三子後台合照，令兩邊粉絲驚喜又興奮。
合照中仲見到周董嘅好朋友阿Ken，阿Ken嘅出現其實係有任務在身，原來係昆凌特別交代阿Ken要帶台灣名產鳳梨酥送畀BIGBANG三子，阿Ken喺自己嘅IG搞笑地質問周董，「今天如果不是因為鳳梨酥，是不是就不找我來了」。
事實上GD同周董一直有私交，二人曾經喺巴黎時裝周同場，上年GD到台灣開個人演唱會，仲特別上周董嘅豪宅作客，相信兩邊粉絲最期待嘅一定係兩位天王可以有音樂上嘅合作。
