周志文、周志康呢對孖生兄弟喺2009年拍住上參加TVB歌唱節目《超級巨星》入行，其後一齊喺娛圈發展，近年哥哥周志文甚少亮相幕前，反而阿康早前通過參加《中年好聲音4》而知名度激增。
兩兄弟繼早前亮相動物歌手演唱會後，隨即喺早前生日時宣布將於11月一齊開騷，門票即將公開發售。周志康同周志文分享獲邀開騷感受，兩人表示相當興奮，亦係首次打正旗號兄弟合作開騷，佢哋之前有幻想過無數次兄弟喺同一個舞台上演出嘅場面，直到今天終於美夢成真。
距離開騷不足兩個月時間，周志文同周志康已密鑼緊鼓同製作團隊開會，商討歌單及落實嘉賓人選。開會過程中，兩兄弟作出決定時都充滿默契，令團隊暢順解決疑難，而周志文同周志康亦可以盡情投入綵排。
