何晉樂近日喺社交平台開心宣布自己考車牌終於pass，原來佢上年肥佬一次，今年捲土重來終於過關，唔怪得阿Rock興奮到第一時間昭告天下啦！
阿Rock話對考車牌有心魔，佢形容「一個渺小嘅人類要駕駛一個足以取人性命嘅大型機器係好恐怖」，佢因工作需要所以侷住要考，而自己上堂過程講得最多嘅一句說話就係「條街真係好多黐線佬」。阿Rock話考牌時驚險不斷，俾同一條友喺同一條路陰咗兩次，好彩自己反應得切。
阿Rock正式晉升P牌駕駛，好多聲夢好朋友都送上祝賀，包括已經有車牌嘅姚焯菲、鍾柔美，仲有《愛‧回家》嘅拍檔古佩玲、李泳豪等。而阿Rock最後仲溫馨提示大家「求吓大家真係唔好亂過路，我真係唔想有意外」。
