譚俊彥劉穎鏇波友變主持拍檔 曾展望一針見血誤踩江美儀「地雷」

大型籌款節目《善心滿載仁愛堂》將於10月17號晚於翡翠台播出，今次節目有八位主持，當中最有驚喜嘅就係有譚俊彥（阿Shaun）同劉穎鏇拍住上，原來二人私底下成日一齊打波，默契方面完全唔使擔心，阿Shaun就搞笑話監製好大膽，因為自己老花睇唔清，Tiffany又唔識睇中文，搵佢哋做主持真係好有勇氣。

江美儀、朱敏瀚同曾展望呢個《試真D唷》組合都有份為籌款出力，近日美儀姐曝光率飆升，佢預告嚟緊晚晚都可以喺電視上見到佢，17號《善心滿載仁愛堂》、18號《試真D唷》，19號開始又有《璀璨之城》正式播出，美儀姐話自己好期待呢套劇力萬鈞嘅新劇。

myTV Super「試真D團隊」打造不踩坑實用遊台指南 

朱仔呢排忙住周圍飛，又拍節目又登台，仲要抽時間幫好兄弟周嘉洛慶祝生日，不過美儀姐就即場投訴朱仔冇約自己，朱仔補鑊話23號《試真D唷》團隊會一齊食飯，不過GM一句攜眷參加又誤踩美儀姐地雷，非常搞笑。

方皓玟當晚擔任表演嘉賓，將會演唱新歌，小明仲預告嚟緊有個新project，計劃由八歲嘅混血囝囝喺MV男主角，最好阿仔原地出道，自己就可以提早退休。

應屆港姐袁絲珩、鄧匡閔同李澤欣第一次參與慈善騷，佢哋都話心情好興奮。Bernice同Ada之前拍咗段Q&A短片，回覆網友嘅提問，因為效果唔錯，所以佢哋都計劃再encore，希望用輕鬆嘅方式，多啲介紹自己俾大家認識。