阮兆輝、尹光、彭健新、「大AL」張武孝、張與辰同顏米羔呢日出席記招，宣布12月將會舉行一個向知名填詞人黎彼得致敬嘅音樂會，一眾好友亦有分享同Peter過往嘅相處點滴。
張武孝憶述自己打張專輯幾乎全部出自Peter之手，仲攞過唔少金唱片獎。除咗工作上嘅合作，杯酒當歌亦都係二人共同回憶。粵劇名伶阮兆輝話自己雖然唔識唱流行曲，但為咗老友都會捨命陪君子。
與辰同米羔呢兩位後輩話自己係聽Peter作品大，對好多作品都如數家珍，當中與辰最鍾意就係《將冰山劈開》，因為細細個已經成日聽媽咪唱。而米羔就話《浪子心聲》好貼切描述自己嘅心聲。
尹光同Peter相識半世紀，當年成日一齊唱粵曲，尹光大讚Peter唱功了得，自己今次喺紀念演唱會上，特別揀唱Peter寫俾許冠傑嘅歌來紀念故友。
