許志安第二晚紅館騷邀請李克勤合唱金曲，安仔衷心感謝對方，因為最初誠邀克勤做嘉賓時，克勤知道日子後好直接話自己唔喺香港，更為安仔改機票返港，力證佢哋堅厚嘅友誼。
二人不但合唱金曲，更大談當年攞「最受歡迎男歌星」嘅往事，重提安仔喺2001年首次奪獎，克勤緊隨其後於2002年獲獎，兩人出道相差一年，當時樂壇競爭激烈。克勤話：「我嗰時真係唔知除咗四個天神（四大天王）之外，仲可以有其他人攞。你攞完之後，大家先知原來自己都有機會。」克勤希望安仔唔好隔太久先開騷，並承諾安仔下次再開演唱會，自己一定會繼續做嘉賓。
到大合唱環節，紅館再次化身超級大K房，連坐喺台下嘅梁詠琪、陳柏宇都同全場歌迷高唱，場面震撼！演唱會尾聲，安仔係台上多謝合作單位時，台下嘅觀眾不斷高呼Sammi名字，就喺燈光轉換、全場以為佢正準備接著唱歌之際，安仔都補上一句：「多謝 Sammi。」令全場歡呼！隨後唱出《我的天 我的歌》。事實上鄭秀文為咗力挺老公開騷，連日喺場館陪伴，屋企人都總動員撐場，夫唱婦隨。
