陳家樂 近日推出歌曲《我們都是無名氏》，好多人唔知道，原來佢23年前係參加新秀歌唱比賽入學，當時只得16歲左右，朋友幫佢報名就去試吓，結果幸運地進入16強，不過獻唱幾句就被叮出局，而其中一位評判就係容祖兒，之後家樂仲膽粗粗走去詢問Joey覺得佢唱成點，結果Joey只拋下一句「你大個啲先啦﹗」
家樂比賽之後得到唔少試音機會，不過佢全部都放棄，佢搞笑回憶有一次英皇叫佢去試音，佢又臨時甩底，結果收到Mani秘書打電話嚟質問，佢因為唔好意思，所以上咗英皇試音，最後成功簽約。家樂話自己原本有機會同陳偉霆一齊成為Sun Boy’z嘅成員，但因為自己練舞過程好沮喪，所以最後放棄歌手路。
隔咗23年重拾歌手夢，家樂話主要係因為個人大個咗，覺得身邊有好多人應該要多謝，尤其結婚之後更加堅定呢個諗法，所以先有出歌呢個決定。
家樂對今次嘅作品好認真處理，更有份參與填詞，老婆連詩雅雖然讚佢嘅文字優美，但咬字發音方面就會難以演繹，當時家樂都唔相信，一心只係想將啲高深字眼擺落去，又代表到自己嘅故事就可以，家樂仲抵死話因為太太中文唔叻，所以先唔信佢，後尾自己真正入錄音室先意識到點解。
之前家樂喺新歌發布會上獻唱，佢話呢個宣傳對佢嚟講好吃力，發佈會前一晚仲擔心到全身冇力，直頭好似行屍走肉。直到有個同事同佢講，將個發佈會當成一場戲，而自己飾演嘅角色就係一個好叻嘅歌手，家樂先搵到方法克服恐懼。講到結婚時曾經對老婆唱《只要和你在一起》，全程因為太感觸唱到好難聽，所以今次一定要上訴唱多次。
家樂嘅新歌獻給一啲曾經幫助過佢嘅人，未來佢會度身訂造歌曲俾老婆同阿女小星星，不過就會阿女行先，因為自從做咗爸爸後，家樂見證女兒成長得太快，好想用歌曲去記載父女情，至於太太嘅部分，自己就希望可以創作一首歌由太太演唱，真係諗起都覺得sweet。
