許志安一連三場紅館騷嚟到最後一晚，尾場邀請到歌神張學友任嘉賓，二人合唱安仔嘅《一家一減你》同學友嘅《我應該》，令現場歌迷大飽耳福。
學友話自己好開心見到安仔重新站上舞台，安仔就話自己好想見到學友，好想同佢親近，學友聽到安仔呢番「示愛」說話，即刻拖住安仔嘅手：「依家呢啲嘢好公開，冇所謂。」風趣言論惹來全場大笑。
學友仲喺台上爆料話自己託咗好多人買飛都買唔到，聽講如果做嘉賓可以有四張飛，所以好開心可以嚟做嘉賓，佢又話因為自己唱歌擘唔開眼，睇唔到提詞機，所以唯有將成首歌嘅歌詞全部背晒。
尾場撞正 梅艷芳 63歲生忌，作為梅姐徒弟嘅安仔，特登喺呢晚嘅歌單加插一首梅姐嘅經典國語歌《親密愛人》，憑歌寄意表達對師傅嘅思念。
