TVB旅遊綜藝節目《試真D唷》剛播出呢集，重新歸隊嘅朱敏瀚（朱仔）與曾展望（GM）合體出動，跟江美儀及張振朗齊齊出動，喺台北獵奇美食同劣質住宿體驗非常搞笑，獲唔少觀眾讚默契非常好，互相推卸責任同頂嘴嘅搞笑互動，完全冇冷場。
試伏品嚐「珍珠奶茶湯底」，黑糖珍珠配鮮蝦同肥牛，GM 忍唔住發文稱「全 trip 之最，點解個糖水有蝦」，更稱「臭，臭但香」，呢種「又甜又鹹、又奶又鮮」嘅奇特味道，令眾人表情糾結，除此之外，主持仲挑戰品嚐「榴槤Blue Cheese臭豆腐」與極臭豆腐火鍋，振朗面色大變，食嗰陣被臭到面紅、青筋暴現兼反白眼，完全失去表情管理，美儀姐吃完仲覺得唔夠臭，要求店家「加臭」，形成強烈對比，振朗沉淪喺臭味地獄當中，更加懷疑人生，綜藝效果簡直拉滿。
江美儀喺社交平台分享一條幕後花絮影片並寫道：「今集開始台北啦，歡迎朱仔回歸！ 但係返嚟就試咗Kam 嘢🤣 臭豆腐火鍋雖然係臭，但係我哋著到咁，無論喺街度，舖頭啲人都望住我哋🤣 都係嗰句，臭還臭，我勁鍾意食😋 至於鵝肉飯⋯⋯大家有目共睹🤭 拍攝地點重見到一隻會同我一齊望鏡頭嘅狗狗呀！So lovely 🥰 下星期日晚8點翡翠台繼續《試真D唷》！」
朱仔因工作排得密密麻麻，差啲未能歸隊，今次佢同GM挑戰一間房價約$300港元一晚嘅劣質套房，似足拍密室逃脫！二人不僅打開門均傳出異味、毛巾發臭，更遇上冷氣配件掉落及小強滿屋嘅驚險場面，嚇到走夾唔唞。朱仔早前喺社交平台開心分享《試真D唷》開工相：「今個星期 台北篇 我返嚟喇！🎉好掛住啲蟲呀、溫泉呀、內臟呀，睇吓我今轉又會瀨啲咩🤡 感恩製作組畀我舐到兩日。」
