佘詩曼同陳山聰不嬲老友鬼鬼，阿佘仲係山聰囝囝Jaco嘅契媽，仲錫到Jaco燶，不時就帶Jaco到處飲飲食食周圍玩。
最近山聰就喺社交平台分享Jaco學踩單車嘅片段，原來係阿佘同陳欣健大女齊齊帶Jaco去玩，山聰表示：「仲話明我唔可以去，點知原來兩位sister 悉心安排帶大佬去學識踩兩個轆。」而喺片中可見，Jaco踩得有板有眼，表現得輕鬆自如，一啲都唔似新手，山聰都好感激兩位帶囝囝解鎖新技能。
阿佘除咗帶契仔去玩，佢同山聰以及一班老友都有去欣賞許志安嘅紅館演唱會，阿佘開心Share同安仔、鄭秀文等多張照片，唔只多謝安仔令大家有個美麗嘅集體回憶，仲話「Encore嘅時候，大家都唔捨得走，所以我哋繼續留喺台底繼續一齊唱，一齊high！期待下一次演唱會」，安仔都有留言多謝阿佘嘅捧場。
