盧海鵬、鄧兆尊、唐麗球、陳昭昭 為一間超巿開幕剪綵，84歲嘅鵬哥中氣十足，早前仲去到內地登台同觀眾見面，已經移居海外嘅阿仔都有陪伴身邊。而有三位女友嘅兆尊感情生活忙碌，加上工作密麻麻，佢自爆自己瘦咗十幾磅，搞到幾位紅顏知己最近迫佢食海參，想佢補補身，不過補就係補骨質，唔係另一樣嘢。
兆尊日前喺網台評論破產避走到外地嘅富家子王賢誌，推算佢起碼走數近一億巨款。呢日再講起事件，兆尊感慨表示，任性同做嘢要分開嚟做，自己想做嘅嘢要衡量一下會唔會賺到錢，唔好只因為興趣去做，同埋要有底線，要記住「唔熟唔做」嘅道理。
兆尊入行後經常被稱「二世祖」，講到「捱」，佢就話自己捱到瞓地下，只係大家唔知，亦幽默表示，其實淨係喺屋企對住媽媽都有排捱，捱完出嚟已經係鐵打。 
