許志安一連三場紅館演唱會圓滿落幕，尾場當晚全場座無虛席，更有唔少圈中人送上花籃祝賀以及到場支持，包括佘詩曼、梁漢文同太太、蘇永康一家，方力申、鄭融、彭秀慧、莊思敏、鄺美雲、陳友等。
嘉賓方面，繼之前有陳奕迅、李克勤出現後，呢晚終極大彩蛋就係有歌神張學友助陣。兩位神級合唱彼此嘅經典作《我應該》、《一家一減你》，擦出超強火花。安仔自認「核突」向學友表白：「好想見到你，好想同你好近。」
學友主動拖住安仔隻手，鬼馬回應：「宜家好公開，呢啲冇乜所謂。」學友搞笑舉動惹嚟全場大笑。安仔仲話聽到學友嘅聲音、捉住學友隻手令佢覺得好溫暖。學友表示安仔演唱會一票難求，自己託咗好多人買飛都買唔到，仲話因為安仔搵佢做嘉賓，先有四張門票。
安仔事後喺訪問話，自己好想同學友唱歌，喺公司同事口中得知，學友經常問起自己，所以佢向學友發出邀請時，學友都一口答應，令佢非常感激。
安仔呢次相隔11年再開紅館騷，喺歌單編排上悉心挑選，同大家重温唔少經典作品，其中《唯獨你是不可取替》、《徹夜纏綿》勾起唔少人嘅集體回憶。安仔更將紅館變成萬人K房，走近觀眾號召全場大合唱，台上台下打成一片，真係High爆全場。
三場演出圓滿落幕，安仔都好唔捨得，除咗感激歌迷們咁多嚟不離不棄嘅支持之外，太太鄭秀文連續三晚化身最強跟得夫人，喺後台貼身照顧，安仔都公開多謝Sammi，感謝老婆嚟捧場及幫佢祈禱。
