樂隊Supper Moment相隔近一年半，再推出廣東歌，繼去年4月《不想將你放下》後，四子帶嚟全新作品《直至矛盾瓦解》，今次新歌由Supper Moment作曲、小克填詞，首次邀得影帝任達華親自執導MV，華哥更落場飾演其中一角，身兼導演與演員。
Supper Moment表示今次與華哥合作，源於一次公司年會。四子與任達華喺席間認識，大家談起電影、演出及拍攝，越傾越投契。華哥分享多年嚟嘅演藝經驗，令四子聽得津津有味，之後忽發奇想，不如邀請華哥為新歌拍攝MV，華哥覺得歌曲好聽，充滿情緒及畫面感，當下一口答應。華哥親自執導兼於MV中飾演其中一個角色，今次首次合作更添驚喜。
華哥拍攝當日由鏡頭、畫面到演員演繹都親自把關，更逐一指導演員如何處理動作、表情及情緒，四子在旁趁機偷師，笑言拍一個MV，等於上咗一堂難得嘅演技課。 MV拍攝由晚上一直進行至天亮，多場戲需要四子親身上陣。其中一幕要喺大型繩網上拍攝，CK期間一度失足，跌倒地上，令在場嘅華哥非常緊張，CK站穩後反而走過去安慰華哥。
早前四子通宵拍攝，主音CK喺繩網上險些跌倒，嚇得任達華十分緊張，豈料CK反過嚟安慰華哥，笑言自己最驚唔係跌倒，而係被華哥要求食最討厭嘅蕃茄，CK笑言勁憎蕃茄，係成世人都唔食，但係華哥話要佢食，同首歌一樣咁矛盾，皆因新歌以人生矛盾為主題，唱出人往往同時擁有兩種截然不同嘅想法，未必每件事都能分清黑白。
四子坦言每個人嘅生活都充滿矛盾，就連拍攝MV當日亦不例外。Sunny直言一方面好想努力工作，將MV拍得最好，但另一方面，就係每次聽到阿仔傳嚟語音訊息，又想立即返屋企陪阿仔，工作與家庭之間難以取捨，讓唔少在職父母都會有共鳴。
Supper Moment近期喜事連連，推出新廣東歌及邀得華哥合作，11月舉行澳門演唱會，門票開售後亦迅速全數售罄。不過四子仍有一個心願未能實現，就係再次踏上紅館舞台，雖然紅館開騷計劃暫時未有着落，但四子未有停下腳步，繼續以新歌及演唱會與樂迷見面。
