富商林建岳千金林恬兒（Emily）於2014年與何柱國兒子何正德結婚，近年專注於慈善事業與個人發展，最近與丈夫何正德傳出婚變，何正德今年被爆跟長髮新歡Janelle熱戀，林恬兒喺風波後保持低調，未想到10月13日係林恬兒42歲生日，何正德喺凌晨於社交平台「贈興」，大曬與新歡Janelle歐遊嘅恩愛合照，正式公開戀情。
何正德與新歡Janelle於2025年底經朋友介紹認識後便打得火熱，於今日凌晨以「Life Updates」為題，一次過上載兩人合照，見佢哋喺呢段時間前往歐洲多國度假留下甜蜜足跡，何正德露出幸福燦爛笑容。
而林恬兒近日前往新加坡睇F1大獎賽，當地好友為佢慶祝生日，林恬兒喺社交平台貼出好友合照，眾人喺新加坡知名法國餐廳聚餐，林恬兒着米白色連身短裙，裙身佈滿立體花卉刺繡與流蘇裝飾，完美展現修長美腿，大騷曼妙身材。
早前傳出林恬兒與何正德12年豪門婚姻驚傳破裂，目前雙方正處於辦理離婚手續嘅階段，林恬兒趁住生日撰文透露心聲，稱「Life is to be celebrated 🦄🤍💎💜🎂」，似隔空回應何正德。林恬兒話呢一年又一年過去，呢一年教會佢好多嘢，並非每一刻都輕鬆，並非事事如意，但依然能搵到快樂，感受到愛，並擁有許多值得感恩嘅事。
林恬兒漸漸學會唔需要事事想明白，有時意味著善待自己，選擇繼續前進。林恬兒話今日要慶祝呢一切，美好嘅瞬間、悄悄成長，以及佢從未意識到嘅力量，願自己能夠擁有更多歡笑，更多平靜，更多讓自己感受到生命美好瞬間嘅時刻，祝自己生日快樂🤍✨。林恬兒喺社交平台未有刪走與何正德昔日恩愛點滴，但字裡行間似乎暗示自己放下，並展開新生活。
