10月12號係陳家樂嘅40歲生日，為人夫又做咗爸爸，生日當然同妻女一齊過啦！家樂喺社交平台post慶祝生日嘅片同相，精靈可愛嘅寶貝女星星錫咗爸爸一啖，相信家樂一定開心過收到任何生日禮物啦！
太太連詩雅準備嘅蛋糕都好有心思，上面有一家三口嘅樣，寫上「Happy Birthday Daddy！」而另一張相就有家樂同Shiga兩公婆對住鏡頭嘟嘴，用神同步嘅表情放閃，真係夠晒sweet。
雖然正式踏入四張，但家樂外型絲毫唔見「佬」味，正所謂男人40一枝花，正準備開花嘅家樂明顯心情大靚，佢寫到「咁就40！我無輸呀！我做到我想做既野呀！」有妻有女事業有成，近日仲圓埋23年前嘅歌手夢，唔怪得家樂可以大大聲話自己「登！四！成！功！」
