今年11月19日係無綫台慶59周年，為隆重其事，無綫昨日（12日）開始播出連串台慶系列宣傳片，當中主題宣傳片以「TVB與你行得更近，走得更遠」為口號，寓意TVB由1967年至今一直陪伴觀眾左右，結伴經歷香港唔少重要時刻。
主題宣傳片以港人看電視的集體回憶為背景，細述TVB從1967年開台起，經歷黑白到彩色、再到高清畫質電視嘅演變史。影片以數代人嘅成長片段為主線，由一班人結集士多看電視、到每家每戶都開始電視汁撈飯，一起見證香港小姐、四大天王、華東水災籌款、北京奧運、熱播劇、《東張西望》等無數經典畫面，展現TVB如何從一個廣播媒介，演變成與港人同呼同吸嘅同行者。
噚晚無綫率先於黃金時段公布三大台慶劇，分別係《愛‧回家之三代同糖》、《璀璨之城》，及《玫瑰戰爭》。《玫瑰戰爭》自開拍以來引爆無數熱話，除咗楊茜堯同林夏薇呢個「黑色月光黃金組合」，仲有陳豪、陳展鵬、馬國明、姚子羚、傅嘉莉、陳自瑤等傾力演出，堪稱「鑽石級超豪華陣容」。「鎂光燈後，暗藏致命殺局」，預告片中，楊茜堯一句「我要你哋承受返同樣嘅痛苦，下一個輪到你！」已劇力萬鈞，期待值爆燈。
至於今年翡翠台台慶綜藝節目則有已播映嘅《試真D唷》、《女神配對計劃2》，及即將陸續推出《美食強人》、《跟風旅行團》、《弊傢伙！有嘢唔見咗！》、《萬千星輝賀台慶》、《萬千星輝頒獎典禮2026》，及TVB Plus嘅《天命之戰》。近日熱播《醫生，你有病？》則為無綫新聞專題紀錄片。
「要跟風，不如跟杜如風」，《跟風旅行團》係杜如風相隔九年、強勢回歸翡翠台嘅旅遊綜藝節目！為搞搞新意思，杜如風由日本轉飛韓國首爾，並跟隨網上過百萬熱搜旅遊片足跡，100%跟足行程、試勻傳說中的韓國食買玩熱點，以精明消費者身份，親身fact check傳聞熱點虛實，避免觀眾盲目跟風誤交智商稅。
