澳娛綜合澳門上葡京綜合度假村呈獻《璀璨之城》，新劇啱啱推出已經熱度爆標，唔單只情節緊湊，劇集仲喺澳門好多景點拍攝，令觀眾喺煲劇之餘又可以欣賞吓澳門嘅風光。好似之前官家同上流社會交流嘅一個大型酒會就見到上葡京內嘅《綠茵勝景花園》、混合中葡建築風格嘅澳門原咖啡、議事庭前地、仲有著名嘅十月初五街餅店等勝地，逐一喺劇中呈現。
呢集劇組嚟到水上地標澳門皇宮拍攝一場開幕戲，高海寧就對其中一面金色嘅牆特別印象深刻，至於張曦雯就最鍾意酒吧場景，除咗整體感覺好高級，所有擺設細節位都做得好靚，完美融合懷舊同摩登兩種韻味。
姜大衞（John哥）、張智霖（Chilam）同吳卓羲（Ron）三父子，為咗權鬥無時無刻都算計緊大家，兩個仔對老竇都不懷好意，尤其係又狠又奸嘅Chilam，John哥搞笑話，Chilam平時睇上去又靚仔又善良，其實額頭寫咗個「奸」字，不過John哥強調所有指控僅限於劇中，「如果唔係靚靚（袁詠儀）都唔會放過佢啦」。
雖然戲入面三父子勾心鬥角，但佢哋私下拍攝時就完全冇呢啲火藥味，John哥仲幫兩個仔各自起咗個朵，Chilam就係「富貴人家」，因為佢周不時就萬歲，至於阿Ron就係「遊戲人間」，咩原因大家就自己諗啦！
飾演兩夫妻嘅阿Ron同Kelly盛傳戲假情真，兩位日前現身宣傳活動時，對戀情口風一致。原來喺拍攝時，Kelly已經對阿Ron特別有好感，佢大讚有阿Ron喺身邊，氣氛特別歡樂，完全唔使怕悶，而高Ling就特別多謝Chilam令大家日日有食神。
