周志康參加《中聲4》追夢，令佢人氣同事業都大躍進，實現唔少夢想，嚟梗佢聯同哥哥周志文舉行首次演唱會。演唱會記招上，兩兄弟率先為在場嘅嘉賓同粉絲預演獻唱。
阿康話收到消息時非常興奮，因為佢同哥哥一齊入娛樂圈，累積17年時間，兩人都好享受音樂，如果可以同大家分享音樂就更開心。
阿文話好耐冇同阿康合作，加上自己已經甚少公開演出。當初聽到開騷消息，阿文係經由朋友口中得知，當時仍然半信半疑，直至TVB聯絡佢先知係事實。
見到台下一張張熟悉嘅粉絲面孔，阿文話有啲人當年着住校服，而家已經抱住小朋友嚟支持，一幕幕嘅畫面，令佢差啲忍唔住喊，佢指有咁多情緒湧現係因為好多人支持佢哋。
至於會否有驚喜，阿康話應該係一段接一段，就好似一本書咁有好多唔同嘅序同畫面，提議大家帶定紙巾。講到騷肌方面，兩兄弟異口同聲話肌肉已經準備好，睇吓大家嘅反應。