容祖兒上周公布明年一月將會喺啟德主場館舉行兩場演唱會，唔少粉絲都敲碗要求加場，Joey喺10月13日晚突發喺社交平台開 Live，宣布加開一場「真頭場」嘅好消息，呢次亦係Joey破天荒未優先訂票已先加場，而呢個史無前例嘅決定，完全係想藉此報答粉絲嘅支持。
對上一次Joey喺香港舉行大型個人演唱會，原來已經係七年前嘅2019《Pretty Crazy容祖兒演唱會》，Joey表示當時曾答應粉絲三年後會再開大型演唱會，但可惜最後等足七年先找數，Joey突然感觸落淚，並表示：「係有種好複雜嘅感動係入面，我自己都好感動，我會畀心機，總之今次呢個騷係有好多感情喺入面。」之後Joey更雙眼通紅，含淚唱出由 林家謙 為佢作曲填詞嘅新歌《陽光普照》。唔少粉絲都紛紛留言為偶像打氣，「真係前無古人，未開賣就加場，叻女」、「到時一齊唱到喊」、「唔好畀咁大壓力自己，你肯開我哋就好滿足。」
、「無論幾多場，隨時趕到」
Joey喺直播期間，亦有一一解答粉絲對演唱會提出嘅疑問，Joey表示呢次個唱嘅舞台設計極具震憾，為顧及全部觀眾嘅視線，最終拍板採用「三面台」。至於點解會選擇加開「真頭場」，而非「往後加場」？Joey就解釋係因為佢覺得每一次歌手嘅頭場，係好需要一班錫佢嘅粉絲喺度交換力量，所以經過一番爭取，最後決定加「真頭場」。佢又透露而家正籌備緊演唱會周邊商品，並會收集大家意見，但就預告一定會推出T恤。
