蔡卓妍 被指近日身材發福，傳出同健身教練老公 林俊賢 造人成功。陀B喜訊一出，雖然阿Sa已經否認，不過呢日佢同林峯一齊現身時裝活動時，阿Sa罕有著上平底鞋又不時以手遮肚，令喜訊傳聞再被提起。不過阿Sa就斷言否認有喜，解釋著平底鞋同大褸只係品牌提供衣著，雙手放肚位置係為咗突顯衣著造型，不過阿Sa話呢段時間確實收到幾百個恭喜短訊，因為啲人都冇fact check一嚟就恭喜佢。
阿Sa只所以肥咗咁多，原來近日同林峯拍緊套賀歲片，飾演一位冇停口嘅食評人，仲要由朝食到晚，令已經戒咗宵夜多年嘅阿Sa有時深夜都食緊飯，唔怪得心廣體胖令佢高呼大鑊。
另外，張致恆Steven 喺網上公開自己欠債七位數，而阿Sa正正係佢其中一位債主，阿Sa聽到消息都覺得無奈，指身邊有朋友早前仍然有幫佢，但睇到新聞話佢仍然冇錢交電費各樣，呼籲Steven應該好好思考點樣改善生活狀況，直指大家唔係欠咗佢，自己對筆欠債已經冇諗過，亦唔想講太多，每當睇到佢啲新聞時都好心悒。
講到之前拍攝嘅電影系列終章煞科，林峯都好唔捨得，但嚟緊佢好快就要投入另一啲拍攝工作。而好兄弟 吳卓羲Ron 傳出同 張曦雯Kelly 戲假情真，阿峯雖然口口聲聲話唔知道，但開心嘅笑容就有啲出賣咗佢，更明示希望好兄弟生活可以更平衡，被追問Ron近排有愛情滋潤係咪春風得意加紅粉緋緋，林峯就話Ron一向都咁得意，平日兩人見面都係做運動，充血紅粉緋緋。
