戴祖儀、周志康呢日齊齊出席一個護齒活動，啱啱拍完《驅魔速遞》嘅Joey，話咁快就染返一頭黑髮，原來呢個係另一部新劇《超時空男臣2》造型嚟㗎！Joey話呢次雖然有機會延續經典，但係佢就話都幾大壓力，事關上一輯口碑好好，又好好笑，所以佢都好擔心自己應唔應付得嚟，不過有幾位前輩傍住，Joey話佢都好安心亦都學到好多嘢呀。
劇接劇嘅Joey感覺越嚟越窈窕，連腰線都出返晒嚟，所以Joey話佢一定要努力keep住呢副body，先可以繼續著露臍裝示人，不過，Joey話雖然自己瘦咗唔少，之但係塊面就仍然係包包面，所以佢都大呻好難瘦面呀。
同樣係忙到無時停嘅阿康，嚟緊仲有好多大project等緊佢，雖然忙到無覺好瞓，不過阿康就好enjoy，仲話忙碌得好開心。好快佢就會哥哥周志文一齊開騷，但佢就話唔會成日諗住令自己內耗，反而佢會選擇實際啲，同製作組好好商量主題、歌單、嘉賓名單等等，希望投入更多意見，令呢個演唱會更加正啊。
