熱播劇《璀璨之城》開播無耐，已經掀起全城煲劇熱潮，一班演員張智霖、張曦雯Kelly、江美儀、蔡一智、姜大衞、陳曉華Hera、陳煒、陳瀅等齊齊食飯睇第三集。呢集劇情劇力萬鈞，Chilam高調迎娶 高海寧，搞到大肚情婦Hera以死相逼，呢一幕重頭戲，真係睇到大家手握拳頭，連電視機前嘅Chilam都話睇得好辛苦，好戥Hera辛苦。Hera睇完自己演出反而冇覺得痛心，因為佢集中留意大家反應。
Hera被Chilam搞到一屍兩命，固之然好慘，但係其實Kelly都一樣慘，當佢去沖涼時，老公吳卓羲就已經喺出面搞搞震，仲同高Ling咀得火熱，要望住自己心愛嘅男人同另一個女人咀，Kelly喺電視機前睇到呢幕，都按奈不住把火，突然擸起刀叉透露出一股殺氣，久久未能平息。Kelly仲爆粗大罵Chilam係渣男，果然睇得相當投入，旁邊嘅美儀姐都話未見到Kelly咁真性情。
飯局上，大家趁住阿Ron唔在場，竟然一齊攞佢同Kelly嘅緋聞嚟玩，當問到呢部劇入面，係咪個個都係悲慘收場時，Chilam竟然漏口風，指住Kelly話得佢好結局，但就話自己講嘅係現實生活中，美儀姐亦加入指Kelly拍得好投入，搞到Kelly即時怕羞臉紅。
《璀璨之城》星期一至五晚 20:30 翡翠台