資深戲劇製作人李兆熊十月初離世，享年89歲。TVB前監製王心慰聯同家屬於10月15日喺灣仔為亡夫舉行追思會，堂內以簡潔佈置為主，靈柩於儀式完畢後奉移哥連臣角火葬場火化，Amy姐步出時，難掩哀傷神情。
同樣曾喺TVB共事嘅好友兼監製徐正康、文偉鴻、高層曾勵珍、資深演員劉松仁、白茵同丈夫黃文偉、鄭嘉穎、鄭丹瑞、李力持等前嚟送別故友。雖然松哥近年身體響起警號，佢早前喺網上解釋狀況，仲叫大家要對佢有信心，呢日見佢精神奕奕，又親切同友人打招呼，步出時由身邊嘅人攙扶住。
白茵姐同李兆熊相識超過半世紀，入行第一部戲已經係兆熊哥執導，對好友離世感不捨。白茵姐話當年經常一齊相約外出玩，每逢過時過節都會聚埋一齊。白茵姐知道故友患咗肌少症好耐，對方因為咁而減少外出，自此就冇乜見面。李力持則視兆熊哥係恩師，要嚟多謝對方，表揚佢對業界貢獻。
