處境劇《愛・回家之三代同糖》呢日有大事宣布，繼第一代《愛・回家》主角 徐榮 之後，《愛・回家之開心速遞》嘅三太 樊亦敏 同KC 歐瑞偉 都重磅加盟，當中最開心嘅一定係啱啱做完手術復工嘅 Terry李偉健 喇！
myTV SUPER重溫全新處境劇《愛・回家之三代同糖》
樊亦敏喺《愛・回家之三代同糖》入面個角色名叫「龔喜」，性格亦比較跳脫，帶畀觀眾唔少歡樂，而歐瑞偉個角色就繼續叫KC，不過中文名就叫「朱基」，係「龔喜」嘅助理。由於拍攝當日KC以一身油漆工人打扮現身，大家信佢個角色同裝修有關，但樊亦敏就話大家一定會有驚喜：「今日佢油油啫，但佢聽日就唔係油油嘅，佢可能係賣魚嘅，後日又可能係踩單車嘅，所以你唔知佢助理啲咩嘅。」
樊亦敏同歐瑞偉加盟前，憑住劇組提供嘅剪影同線索，已經喺網上引起競猜熱潮，由於劇組畀出嘅提示，一個係「大隻仔好打得」，另一個貼士係「美貌與智慧並重」，所以呢日做訪問時，歐瑞偉同Terry把口好似食咗蜜糖一樣，氹得樊亦敏相當開心。
近日傳出 吳若希Jinny 戲份將會有所變動，車婉婉就話唔知對方幾時請假同請咗幾耐，但就承認已經拍咗一幕交代Jinny離開嘅戲份，仲話自己當日喊到停唔到。至於講到樊亦敏同歐瑞偉嘅加入，婉婉就話最重要係要先改口，由「三太」改為嗌「龔喜」，同時亦指佢哋會撞出唔少火花。
提到之前睇 許志安 演唱會時，聽到全場大合唱佢同安仔首合唱歌《會過去的》，婉婉直言相當感動。