陳奕迅（Eason）每次演出均尋求新意同突破，Eason宣布將於今年12月至明年2月，喺香港演藝學院歌劇院，舉行26場演出，有別於以往嘅演唱會，今次係畀大家現場見證佢錄音。
Eason將於創造香港樂壇首次創舉，將錄音室搬上舞台，以公開方式重錄經典專輯，觀眾可以成為座上客即時欣賞。Eason踏入樂壇卅載，多年來推出不少專輯，佢喺當中挑選咗26集專輯重新灌錄，包括《陳奕迅》、《與我常在》、《天佑愛人》、《我的快樂時代》、《Shall We Dance？Shall We Talk﹗》等。
Eason一向鍾意同人分享音樂，應該好多人都知嘅，但係一次過同咁多人用呢種方式去唱，Eason話呢次真係第一次，亦應該只得一次，又話有啲歌當年只錄過一次，有啲情感只有當時嘅年紀先唱得出嚟。Eason相隔多年後，人生經歷同聲音均有轉變，當年Eason遇上今日嘅自己，同一首歌會產生咩變化，佢希望透過26場現場錄音同大家一同尋找答案。
是次演出最特別之處，歌迷除咗能夠近距離欣賞Eason錄音外，中場時，Eason亦會分享歷年唱片嘅創作點滴、錄音回憶，以及歌曲背後鮮為人知嘅故事。
