TVB開拓精品短劇新賽道，無綫集團有限公司同內地大型短劇平台「紅果短劇」合作，正式踩入豎屏劇市場，首部聯合打造嘅重頭劇就係經典神劇《金枝慾孽》番外篇《金枝慾孽之宮牆折柳》，劇組喺橫店舉行盛大開鏡儀式。儀式上劇組特別安排播放經典配樂《詠嘆調》，勾起全場回憶，幾位演員仲即興重演原版《金枝慾孽》多個經典名場面。
重溫《金枝慾孽》後宮無休止爭鬥
對於有機會與時並進拍攝豎屏短劇，陳豪、龔嘉欣同 陳自瑤Yoyo 覺得好有新鮮感，陳豪相隔22年再演孔武，被身邊嘉欣及Yoyo笑指細細個就睇《金枝慾孽》，Yoyo同嘉欣今次角色上都升咗級，分別出演皇后同正貴妃。
阮浩棕 同 倪嘉雯 亦有幸能份參與呢個經典IP，Carmen話今次參演獻出多個第一次，包括首次演古裝、首次拍短劇及首次到橫店，感覺非常興奮。阮浩棕飾演親王，佢覺得今次係好好學習機會，因為短劇推進度較快，好彩有專業嘅導演指導。
新劇仲邀請到內地短劇女神趙夕汐演出，第一次參與香港製作一定好有新鮮感，而呢個經典IP亦係佢非常鍾情嘅，佢冇諗過有幸參演，感覺非常榮幸，仲即場示範同劇中不和嘅陳禎怡演掌摑戲。
全場演員以清朝造形亮相，當中見到 鄧智堅 同 羅毓儀 以現代人裝束現身，原來兩人剛抵埗即參與開鏡儀式，之後先正式試造形，今次亦係兩人首次演清宮劇，佢哋都相當期待。