10月20日係已故邵氏功夫影星傅聲72歲冥壽，李修賢受訪談及師弟傅聲早逝，多年嚟仍難以釋懷，而傅聲摯愛甄妮當年悲痛欲絕，暫退演藝圈及關閉「金音符」唱片公司，甄妮近日亦再度推出珍藏套裝，收錄由其親自籌劃並監督製作、金音符絕版已久嘅五張經典廣東專輯「重生」。
甄妮喺1977年經狄龍介紹與傅聲相識並一見鍾情，隨後結婚。傅聲於1983年不幸因嚴重車禍意外逝世，前輩甄妮隱退多年，早前宣布再度推出全球限量發行200套嘅「甄妮–金音符。摯愛珍藏套裝」。
音樂製作人Alex Fung（馮貽柏）早前喺社交平台貼出前輩甄妮嘅近照，相中見甄妮風采依舊，雍容華貴、氣質不凡。Alex Fung好感謝前輩俾機會，重新打造呢五隻珍貴嘅唱片，留一個好好美麗嘅回憶。
Alex Fung話細細個喺阿嫲啲卡色帶聽前輩甄妮喺TVB電視劇唱主題曲《奮鬥》，仲嗰陣時仲買過前輩啲唱片，自己唔覺意地廿年前邂逅，同佢做咗兩次紅館嘅演唱會，前兩年仲幫忙搞吓版權問題，「我又同佢傾吓佢金音符唱片公司有冇空間可以搵啲嘢發生，咁樣樣就同佢復刻咗佢五隻40年前嘅重點黑膠」，用咗超過一年時間去重新整理封面，又搵咗英國頂尖Metropolis Studios重新進行專業母帶處理及混音，今年出咗佢嘅一些珍藏…」
恰巧近日李修賢亦講起同門師弟傅聲，74歲李修賢縱橫演藝界逾半世紀，早前接受資深傳媒人汪曼玲嘅網上訪問，對於師弟傅聲早逝難以釋懷，提及1983年奪命車禍，修哥痛心還原慘劇細節，稱當年汪禹駕車企圖越線超車導致交通意外，摯友傅聲重傷不治，成為李修賢心中永遠無法撫平嘅遺憾。
李修賢回想二人兄弟情誼，坦言好唔捨得呢個好同學，更透露傅聲當年出身名門，可惜入訓練班時，家人未有支持，「唔畀錢佢，搞到飯都冇得食」，李修賢不時請客食飯，二人感情非常好。李修賢回想二人後生時堪稱全邵氏「最曳嗰兩個」，李修賢笑稱當年傅聲冇錢買煙食飯，兩人竟然跑去搵方姐借五百元，遭拒後闖邵氏停車場大鬧，話二人跳上車頂係咁踩，踩到車頂凹晒，製片部衝出嚟嗌「落嚟落嚟，借畀你」。
李修賢當年喺邵氏受訓僅7日，喺練功被恩師張徹導演一眼睇中簽約7年，雖然張徹極愛錫弟子，但李修賢坦言恩師喺電影上從未給予主角機會，李修賢話蔡瀾先生都講過好多次，張徹唯一冇捧過就係李修賢，李修賢喺《五虎將》演其中一虎，話張徹最錫係聲仔、最唔錫係自己，但李修賢心存感恩、飲水思源，對恩師毫無怨恨，覺得「人哋帶得你入行，畀咗個起點你，你仲怪責啲咩？條路始終係靠自己行出嚟」。