修哥 胡楓 出現嘅地方一定係笑聲連連，因為學修哥嘅契仔張家輝喺10月18號晚播出嘅節目《一周星星》話齋，修哥嘅轉數非常快，大家咪以為修哥之前身體唔舒服，會影響佢嘅轉數，今次又再一次證明修哥係寶刀未老喇。
修哥7月底喺新抱Jojo陪同下拍片，透露早前因突發性膽管炎引致膽石堵塞，一度需入住深切治療部，並插喉昏迷4日，當時主診醫生形容極度危急，幸好修哥福大命大，接受手術後康復出院。
一向鍾意出席大小飯局嘅老友嘅修哥，出院後亦乖乖留家休息變得深居簡出。直至近日，修哥開始現身老友飯局，關寶慧就分享咗一張同修哥食飯近照，佢話「開心見到修哥精神颯爽，轉數快到不得了，見到我馬上的第一句話：你今晚唔使做騷咩？叻到不知得了。」大家見到修哥咁精靈活潑，相信都會好開心。雖然修哥出席飯局，佢都好聽話戴住口罩保護自己，而出席飯局嘅人仲有肥媽、向海嵐同黃錦燊，仲見到已久未露面嘅莫家堯。
