區瑞強下月開騷大唱陳百強金曲 鄭國江創作字畫拍賣行善夥電台好友爆料

11月底將舉行兩場演唱會嘅 區瑞強 ， 呢日同主辦單位以及多位好友出席記者會宣傳，填詞作品無數嘅 鄭國江 電台拍檔 鄭子誠 麥潤壽 仲有 吳大強 等都有出席，Albert仲即場獻唱兩首 陳百強 嘅金曲。

Albert仲話演唱會會有一個環節，大家會演繹鄭國江當年為Danny所寫嘅各首歌曲，而鄭老師仲事先將《漣漪》歌詞變成一幅字畫，仲會於現場公開慈善拍賣。

呢次Albert會同喺電台結交成為好友嘅子誠仲有麥Sir以及周國豐一齊開金口，子誠就笑指自己會負責導讀，繼續以「音樂情人」嘅靚聲同大家分享，到時仲會傾吓數十年來電台工作嘅趣事咁話呀。