陳奕迅 入行30周年，宣布12月至明年2月期間，舉行26場現場錄音演出。有別於以往於大型場館演出，今次Eason特意將「錄音室搬上舞台」，公開俾歌迷見證重錄經典專輯嘅過程。唯因場地座位有限，官方抽籤發售尚未正式開始前，各大二手購票平台已驚現天價黃牛票，尾場門票更被炒至價錢狂飆逾十倍，引發大批歌迷極度不滿。
對於今次選擇於只有1181個座位嘅演藝學院歌劇院「錄音」，Eason亦親自喺社交平台揭開背後原因。他感性回憶道：演藝學院俾我嘅第一個印象，就係1989年張國榮嘅音樂特輯《日落巴黎》裏面出現過嘅一個場景，記憶猶新。
但講到最深刻嘅印象，都莫過於係我喺1995年7月16號喺香港演藝學院歌劇院參加第14屆新秀歌唱大賽總決賽，我嘅演唱生涯咁就喺嗰度開始咗。
我想借呢個機會衷心多謝當晚TVB綜藝科嘅所有工作人員，當時華星唱片嘅所有同事，當晚八位評審，包括著名指揮家三寶老師、SLUMP爆風樂隊主音中野裕之先生、著名音樂製作人小蟲老師、著名作曲家林敏怡小姐、YT、著名音樂創作人倫永亮先生、我喺華星唱片嘅第一位音樂監製江港生先生、前無綫電視綜藝科總經理曾國強先生，俾我嘅肯定，仲有當晚嘅主持人鄭丹瑞先生，其他七位參賽者，包括楊千嬅、高傑、滕麗名、許建邦、賴韻詩、王小萍、林迪，同埋現場所有觀眾俾我嘅熱烈掌聲同支持，我先至有一個咁好嘅開始。
所以呢個地方，對我嚟講，意義特別重大。
今次26場演出將現場重新錄製《與我常在》、《U87》、《H3M》等多張經典專輯，且每場曲目完全唔重覆。由於現場將同步正式錄音，所以入場規則極其嚴格，觀眾手機必須關機並封存，而演出期間需保持安靜亦不可隨意拍手歡呼，以將最完美原音呈現。
雖然今次門票安排於10月28日正式接受觀眾登記，但各大二手二手票務平台已出現大規模黃牛炒賣風氣。據報道指12月12號首場門票已被標價至$7996起，而明年2月20號嘅尾場門票更被瘋炒至 $13563，比起原價($980~$1280)暴升逾十倍！
由於每場座位有限，加上未抽籤已被黃牛攻佔，大量歌迷紛紛於網上痛批黃牛猖獗，無奈直言「真粉根本抽唔到」，並強烈要求主辦單位考慮實施「購票及入場實名制」，保障真正支持偶像嘅樂迷利益。