以個人身份發展嘅 穎喬 推出第二首個人單曲，以R&B風格演繹全本地製作新歌《為誰來奮鬥》。以故事形式拍攝嘅MV，仲特別邀請香港排球代表隊成員 鄭旨睿 參與。首次擔綱MV男主角嘅鄭旨睿與Ziva共同演繹一段充滿拉扯、現實同自我救贖嘅故事。
ZIVA仲親自解釋邀請高大威猛嘅鄭旨睿參演原因：「係我親自邀請佢嘅，因為佢嘅外表有啲似我過往嘅一段感情嘅男主角。」對首次以演戲形式拍攝MV，ZIVA就話：「我好感謝鄭旨睿一口答應幫忙做呢次MV男主角，我哋都未拍過任何戲劇所以都擔心會唔會尷尬，不過好好彩，唔知那來的默契，好快我哋就投入喺歌詞故事之中。」
《為誰來奮鬥》內容描述一對戀人，由傷痛、冷眼旁觀到最終重生嘅心路歷程，所以兩位主角都要精準呈現出女主角面對逆境時「受傷、自救、解鎖」嘅覺醒過程。 MV以「陶藝」作為核心，Ziva同鄭旨睿最初親密合作拉陶瓷，流露無盡甜蜜。然而溫馨場景劇情發展轉化，由熱戀期嘅歡聲笑語到經歷分歧、再到男主角變心，Ziva要獨自面對破碎現實。
Ziva補充話：「我真係要大讚我鄭旨睿嘅演技，我同佢雖然都係第一次演戲，但好短時間由熱戀到離開我，佢都演繹得淋漓盡致，亦都令我好容易投入其中，真係好感激佢今次嘅付出。」
