TVB親子旅遊真人騷節目《玩住學。學住玩》，繼支嚳儀同囝囝Joji遊雲南後，今晚播出嗰集有賴慰玲（阿賴）帶8歲大仔梁進也（也仔）接力登場，赴馬來西亞沙巴親子遊，遊歷異地生活及文化，享受兩母子首次海外旅行。
myTV SUPER 沙巴親子遊
阿賴出發前已讚也仔唔扭計，有問題亦可以「傾」出解決方案，阿賴憶述全家旅行試過錯過航班，當時佢驚慌失措之際，也仔就好淡定話改搭其他航班，也仔懂得照顧身邊人，又鍾意探索新事物，絕對係好旅伴，阿賴強調湊仔著重與囝囝溝通，不打不罵。二人到埗即醫肚，前往街坊茶室品嚐地道美食，享受「拍拖」感覺。
阿賴明知也仔對榴槤好厭惡，佢堅持帶阿仔去「榴槤街」，睇吓阿仔能否衝破障礙試一啖，一輪榴槤攻防戰後，阿仔反應出乎阿賴意料之外。阿賴先用唔同美食以一款食物搭一啖榴槤嘅方式，希望也仔試一啖，不過也仔不為所動，最後阿賴出動也仔最愛飛機作利誘，話只要也仔肯試食，就帶也仔搭A380空中巴士，也仔即心動問「要食幾大舊」。
二人傾條件由經濟客位講到頭等套房（Suites），「交易」成功，原來也仔下定決心試食，並非為乘坐A380，而係覺得難得嚟大馬，想試做未試過嘅事。阿賴坦言也仔表現好有驚喜，因為阿仔願意開放自己。
也仔係一個超級飛機迷，理想職業係當飛機師，未出發先興奮，兩母子翌日登上A380，出發去大馬度假勝地仙本那，體驗海島生活。二人將會探索大馬度假勝地仙本那，仙本那有被稱為「最後的海上游牧民族」巴瑤族，阿賴此行亦與也仔一齊了解巴瑤族嘅獨特異地文化與生活方式。
此外，阿賴近日分享喺社交平台見到一位已為人母嘅網民問「明唔明嗰種只係想靜靜地飲一杯咖啡☕️ 只係好想躺平睇劇敷一塊mask 🎭 只係好想好好地去一個洗手間📱 但係我真係好愛我嘅小朋友❤️」，已為兩子之母嘅阿賴，坦言真係媽媽先明兩者點解有關係，「我明！我真係明！媽媽唔係鐵人，要愛自己，要懂得休息，要懂得對自己溫柔🤍共勉 」。
《玩住學。學住玩》逢星期一、二、四、五晚上 22:00 – 22:30 於TVB Plus播出