麥明詩 Louisa Mak 早前喺社交平台分享咗一張佢同關之琳嘅合照，本來係想分享同偶像打卡嘅開心事，點知就意外喺網上掀起連番風波，唔少網民將焦點放喺兩人嘅狀態上，更有人留言質疑麥明詩「只P自己、唔P前輩」，甚至更有媒體以此為標題報道此事。
事件發酵多日，面對排山倒海嘅「P圖」質疑，麥明詩終於喺 19號 正式於社交平台發文反擊。為以正視聽，佢直接曬出當日張相嘅數據（Metadata），用鐵證證明自己絕對沒有進行任何「獨家修容」。麥明詩喺帖文中大呼冤枉：「其實我自己都好鍾意睇threads，大家吹吓水、亂噏吓，一笑置之。睇開threads嘅讀者都有自己判斷能力，不過當啲傳統媒體走上去cap啲po當新聞咁報，個問題就出現啦，傳統嘅觀眾就基於媒體嘅可信性而接收件事，真係以為我P自己唔P人…我一定唔會呀！佢好靚，都唔知可以P啲乜。」
對於被指刻意「大細超」修圖，麥明詩無奈表示：「我只係以小粉絲嘅身分同之琳姐打卡，我冇機會同佢解釋翻，希望之琳姐唔會誤會我啦🫣」同時佢亦笑言早前因工作太忙，所以一直無暇理會呢場風波，並自嘲標籤「#我不是女神 #我只是小師奶」。
