鄧麗欣 時隔14年再推出個人專輯 ，日前更舉行兩場唱片發佈演出，唔止Fans逼爆現場，多位好友陳健安、藍奕持 仲有多位曾合作過歌曲MV同電影嘅導演黃綺琳、何妙祺、陳詠燊、伍健雄 同 馮志強 等齊齊捧場，而同門靚仔小師弟 何柏臻 亦幫歌迷戴手帶同派發應援物，加上音樂會適逢Stephy生日，現場逾千歌迷為佢慶祝，令氣氛更熱鬧。
音樂會演出分為「過去」、「現在」和「未來」等不同章節，Stephy亦先後演繹新專輯《Tathātā》嘅作品同唔少金曲。當唱到《藍鞋子》、《他不准我哭》同《不要離我太遠》等作品，歌迷就齊齊揮動手燈大合唱。
而兩晚演出歌單由歌迷投選唔同sidetrack歌，好似頭場《我未願意》、《念念不忘》，以及第二場嘅《不速之約》同《被遺棄的公主》等。台下歌迷嘅熱烈反應仲令Stephy揚言考慮舉行sidetrack音樂會。
首場演出當晚同時係Stephy生日正日，台上大屏幕播出歌迷向佢送上祝福片段，陳健安就同Lester鬼馬扮工作人員推出生日蛋糕，令Stephy哈哈大笑，說：「公司請啲工作人員咁靚仔嘅，落重本喎！」呢晚佢又演唱出道初期、第一首包辦作曲填詞、亦從未公開演唱嘅作品《小紅帽》，一開口唱就感觸落淚，台下歌迷就揮動手燈為佢打氣。到第二晚再次獻唱時雖然成功忍淚，不過到最後一曲《仍留在這裏》時，全場歌迷大合唱、加上大屏幕播放佢同歌迷嘅昔日合照，加上歌詞感人，Stephy結果再次眼淚決堤。
Stephy對兩場新專輯音樂會圓滿成功非常感動，佢話：「新碟發佈會聽落好似好簡單，但其實意義非常深，相隔咁多年再出碟好感動。做一張唱片好唔簡單，除咗要有好歌，仲要加入好多心思。呢張碟記錄咗好多我嘅成長、好多嘢裝載喺入面。今日同大家一齊分享，嗰個重量就好似做一場大型演唱會。」Stephy今次應歌迷要求，歌單加入多首sidetrack，她坦言當作為之後開sidetrack演唱會熱身。
至於首晚唱《小紅帽》時灑淚，佢就指：「呢首歌放喺我第一張唱片，我第一次自己作曲同填詞，歌詞好勵志。唱嘅時候就好似20幾年前嘅自己，同而家嘅我對話，被以前嘅自己鼓勵，所以唱到某啲歌詞、仲要聽到台下啲歌迷一齊唱，真係忍唔住。」
而第二晚於音樂會最後一曲《仍留在這裏》時再失守，佢就笑言：「無辦法，真係好感動，好感謝咁多年支持我，留低陪我嘅人。唔知點解喺台上好眼淺，特別容易觸動，平時嘅我好堅強架！」