現年57歲嘅視帝鄭嘉穎近年淡出幕前，專心喺屋企做「最強奶爸」，照顧與太太陳凱琳所生嘅三個寶貝仔。向來予人型男形象嘅佢，日前就被網民喺平民兩餸飯店「野生捕獲」，私下極度貼地嘅一面曝光，迅即引起全城熱議！
有網民喺社交平台上載咗一張live photo，透露喺人氣兩餸飯店「權發小廚」食快餐時，竟然巧遇男神鄭嘉穎。片中所見，當日鄭嘉穎身穿簡約嘅淺灰色Polo恤及長褲，手持銀包排隊買外賣。雖然佢戴上太陽眼鏡，但憑住招牌清爽短髮同保養得宜嘅「凍齡靚佬樣」，喺人群中依然星味十足。
呢位網民喺帖文中留言直呼「發夢都想不到」，更笑言自己當場呆咗好幾秒，先敢確認眼前人就係經典劇集《步步驚心》入面嘅「八爺」本尊：「原來男神私下真的會來這種平民小店買菜，一點架子都沒有，太接地氣了。沒敢上去打擾，遠遠看著就已經很滿足了～」
唔少網民睇完片後，都讚鄭嘉穎全程表現得悠然自得，唔只笑容滿面地同店員傾偈，對點菜畀多等動作都相當純熟，完全冇大明星架子，一睇就知平日成日幫襯，絕對係熟客。又讚鄭嘉穎為咗太太陳凱琳而全面回歸家庭，擔起照顧三個囝囝嘅重任，實屬係絕世好老公。
