慈善節目《善心滿載仁愛堂》日前圓滿落幕，羅志祥（小豬）、譚俊彥、連詩雅（Shiga）、胡子彤、陳宗澤（CY）、尹光、陳奐仁、黃洛妍，應屆香港小姐冠軍袁絲珩、亞軍鄧匡閔、季軍暨最上鏡小姐李澤欣等一眾藝人為籌款傾力表演。
小豬打頭陣出場唱《高調愛》及《有點愛》，仲落台跟大家近距離接觸。連詩雅與Supper Moment主音Sunny合唱《殘忍告別式》，講到老公陳家樂近期正式做樂壇新人，Shiga對老公自彈自唱表現讚賞有加，仲話老公陳家樂拎住結他係型嘅，Sunny話可以大家合作吓，仲問家樂係咪Band仔出身時，Shiga即開口護夫，叫Sunny唔好畀家樂壓力。
馮允謙（Jay Fung）同林奕匡呢對好耐冇見嘅老友，一見面就雞啄唔斷，皆因林奕匡升呢做爸爸後，大部分時間放晒喺阿仔身上，少咗機會同Jay Fung打波。林奕匡原本5月返加拿大，因工作安排，佢順延到暑假先同阿仔返去探親，阿仔係8月尾生日，咁一家人提早一齊慶祝，笑指阿仔夠2歲就要買多一張機票，所以喺阿仔生日前2日就返港，而Jay Fung早前快閃一星期返加國，主要係探望另一半。
方皓玟今年陸續推出兩首新歌，出年去寶島開騷，佢話喺當地出道，隔咗咁多年再去探吓啲朋友，方皓玟覺得好開心，試過有次去當地旅行，見到歌迷接機，方皓玟亦感到好驚喜。
