上星期先踏入52歲嘅 劉愷威 傳出新戀情，雜誌報道直擊佢同現年32歲、身材姣好嘅模特兒兼演員 黎紀君 Christy相戀，兩人一齊出席朋友聚會，唔止一碗米線兩份食，更手拖手離開度良宵，消息亦隨即喺娛樂圈成為熱話。
劉愷威近年專注喺內地發展，同內地花旦 楊冪 育有女兒「小糯米」，可惜到2018年兩人離婚。之後愷威嘅感情生活就一直都係外界焦點，呢位「黃金單身漢」之後曾同內地女星 李曉峰 高調認愛，兩人一度愛得甜蜜，仲多次被拍到同遊放閃，甚至傳出過婚訊。
不過，呢段戀情最後都係無疾而終。而早前愷威嘅父親 劉丹 出席活動受訪時，不經意間「口快快」爆料，指乖仔同李曉峰早已分手，變相幫阿仔「宣佈」回復單身。
點知單身消息傳出冇幾耐，不過原來劉愷威已再有新戀情。報道指劉愷威同黎紀君因朋友聚會而結識，好快就擦出火花。黎紀君過往喺娛樂圈亦有唔少新聞，曾同王宗堯等男星傳過緋聞，外型甜美加上一身骨感身材，絕對係「男神殺手」。
而戀情爆出後，劉愷威同黎紀君回應時亦大方承認戀情，指兩人拍拖約一個月，兩人有喜愛網球運動嘅共同興趣，非常夾得來。
唔少網民都大讚劉愷威保養得宜，同年輕嘅Christy一齊完全冇違和感；亦有網民笑言要等丹爺下次出席活動，睇吓丹爺會唔會再代仔爆出關係最新進展喎。