TVB戀愛真人騷《女神配對計劃2》播出後，唔少網民非常留意一眾女神們嘅感情動向，何沛珈近期與另一女神俞可程（Kanis）爭奪「冷氣男神」方智弘（Oscar），引發唔少網上熱議，何沛珈日前接受傳媒訪問時，壓力爆煲忍唔住喊。
何沛珈喺社交平台遭網民負評，被指係綠茶女、機心女，甚至連其工作態度亦被批評，何沛珈受訪時有感自己「好似做乜都係錯」，好似將佢6年喺工作上嘅努力抹殺咗。
何沛珈坦言希望以最真實反應去拍攝，拍攝初時唔識去玩戀綜，節目播出街後越嚟越多負評出現，何沛珈明白每次唔同節目出街都未必喜歡，但佢冇諗過今次會咁多人討論，令何沛嘉陷入自我懷疑。
何沛珈澄清「搶仔」指控，話表達好感前，私下有問過女神Kanis嘅意見，Kanis都想繼續了解其他人，何沛珈先覺得可以去試吓表達好感，話唔存在「搶」呢回事，何沛珈直言係真係對Oscar有興趣，之後有機會傾過偈，想繼續了解對方，但而家畀人鬧爆， 何沛珈擔心連累Oscar，覺得自己好似污穢咗，好驚染污咗對方，已刪除社交平台避風頭。
隨著最新播出嗰集劇情發展，演變成「4女爭1男」，Oscar、何沛珈同Kanis呢個三角關係，隱藏女神陳星妤（Yvette）及梁超怡（Chiuyi）亦加入戰團，記得留意《女神配對計劃2》啦！
