何家千金 何超蓮 2022年參與嘅首部電影演出，首次踩入影壇就參與內地動作巨製《敦煌英雄》，仲同老公竇驍 「夫妻檔」首度喺大銀幕合作。今日正式發佈香港預告同海報，宣佈29號正式上映。
《敦煌英雄》陣容極為豐富，由內地神劇《長安十二時辰》黃金幕後再度聯手，加上章宇、竇驍、雷佳音、朱亞文、周一圍同何超蓮等卡士演出。影片更花咗超過3年時間精心進行重新後製。
據指製作團隊深入河西走廊同敦煌戈壁實景拍攝足足幾個月，又未有運用虛擬特效，當中千斤重甲、真刀真槍，甚至千軍萬馬騎兵衝鋒，全數都係實景拍攝。並同時參考咗千年前敦煌壁畫嘅色彩同服飾細節，將歷史質感追求極致。
新片故事設定於唐朝安史之亂後，敦煌漠州落入叛匪手中長達60年。劇中張佑承之女張月牙與「大漠孤狼」狼鷂子等人臨危組隊出城求援，喺茫茫大漠同險境中展開一場血戰與歸義傳奇。而超蓮同竇驍點樣喺大漠沙海中大展拳腳，就記得入場欣賞喇。
