導演徐克日前出席香港演藝學院頒授儀式，獲頒授榮譽博士，以表揚其多年嚟喺演藝業界嘅貢獻，好友林青霞以《新蜀山劍俠》嘅瑤池仙堡堡主經典造型獻花祝賀。
關錦鵬獲頒榮譽院士，阿關謙稱受之有愧，關錦鵬話拍電影係做啲自己喜歡嘅嘢，近年喺城大擔任客席教授，致力於電影教育與精神傳承，佢好想趁呢個機會感恩有幸喺70年代尾、80年代初，喺無綫電視菲林組，跟到幾位好出色嘅導演許鞍華、譚家明、余允抗同章國明等。
關錦鵬憶述自己係「紅褲仔」出身，眨吓眼入行半世紀，有幸同多位巨星梅艷芳、張曼玉、梁朝偉、周潤發、金燕玲、鄭秀文等合作，自己係好欣賞好鍾意，好感恩好開心。
關錦鵬坦言對梅艷芳離開係感到好難過，當年佢跟梅姐、哥哥張國榮有另一個新合作企劃，梅姐同哥哥都應承，可惜喺2003年先後離開咗，關錦鵬選擇將呢個project擱置，話等於《胭脂扣》有人問佢會唔會重拍，關錦鵬亦問：「邊個搵番梅艷芳同張國榮畀我！」關錦鵬斬釘截鐵地表明絕不重拍經典作《胭脂扣》，喺佢心目中呢兩位巨星傳奇地位係無法被任何人取代。