車婉婉 同 黑妹 李麗霞 日前一齊出席活動，分享減壓秘訣。婉婉有份演出嘅《愛．回家之三代同糖》近日宣佈 樊亦敏 同 歐瑞偉 加入角色陣容，而佢就指再同兩位合作非常開心，仲諗起年前同Amy姐合作已係《大醬園》。
佢仲話兩人加入後，令劇集有更唔同嘅化學作用，希望令觀眾更喜歡，仲暗示繼續會有唔同角色同內容發生，叫大家記得留意呀。雖然拍處境劇日日忙，不過寶貝仔 BBQ 就係最忠實觀眾，仲會整古做怪叫媽咪做冰冰，非常可愛。
至於黑妹姐呢日就提到，自己行走江湖獻唱演出多年，仲發覺自己遇到壓力或者唔如意時，出力唱歌就係最佳嘅減壓方法，每次上台演唱就會乜唔記得晒，仲指乖孫似乎都遺傳到自己嘅歌喉同音樂基因，仲把握孫仔英國返港嘅機會好好享天倫樂呀。
