林夏薇同羅子溢呢日現身馬來西亞出席活動宣揚健康訊息，《中年好聲音4》唱將鄭仲豪獻唱《海闊天空》之外，子溢亦大開金口唱《不想獨自快樂》助興。
薇薇身穿低胸貼身裙盡顯優美身段，喺時裝設計師陪同進場，行catwalk嗰陣頓時成為全場焦點。薇薇話本身好少行catwalk，因有設計師陪伴，令佢倍添自信，薇薇覺得健康同內在美都好緊要，由內散發出嚟就係最靚，子溢都話結婚後好著重身體健康。
子溢愛妻楊茜堯同薇薇新劇《玫瑰戰爭》就嚟播出，子溢就話上次喺《黑色月光》未夠戲癮，好期待佢哋再次鬥法，子溢笑言美中不足係自己冇份，夾喺茜堯同薇薇中間就好完美喇！薇薇聞言就話知道要點演，茜堯搵佢復仇，佢就向子溢復仇，子溢笑住話自己變咗最慘嗰個。
