一度位列香港女首富嘅 劉鑾雄 太太 陳凱韻 最近正式推出時裝品牌KUUKee，更擔任品牌設計師。年前對鈎織產生大量興趣，其後創立手作品牌之後，甘比最近將趣味、舒適同精緻工藝結合，推出奢華日常風格嘅時裝品牌「KUUKee」，寓意獨特、玩味而迷人嘅個性。透過色彩、自在廓形同細節設計，加上 「輕便」」同「Serotonin Dressing」(血清素穿搭)理念，延伸甘比鮮明、率性同充滿愉悅嘅個人美學。
甘比話： 「我想同更多人分享輕鬆生活哲學，Happy Yarn嘅定位是鈎織手作，難以大量製作 。所以我決定創辦KUUKee ，好似一個平台俾我發揮創意同更多人分享 ，為生活添上玩味色彩 」
品牌早前舉辦獨預覽活動，甘比更親臨現場同顧客見面，分享作品背後嘅工藝同巧思，而首個系列中，甘比糅合自己喜歡嘅風格，細節反映佢身為媽媽同事業女性嘅日常需要，佢話：「系列刻意加入了好多袋，因為我日常有好多隨身物品，手機、銀包、紙巾、濕紙巾等等，隨身嘅袋就會好方便，亦可以帶來更多安全感。 」活動當日唔止吸引大批嘉賓出席 ，銷情亦非常熱烈，部份款式唔夠半個鐘已告斷碼，部份貨品更需要預售。
甘比仲指品牌由構思到推出歷時一年有多，除咗於知名時裝店嘅專櫃以外，仲預告網店今個星期六就會正式營業，佢仲興奮透露：「品牌11月底就會進軍韓國市場，於當地廣受韓星同名人歡迎嘅潮流名店BOONTHESHOP開設實體店，韓國嘅朋友可以去實體店親身感受，希望好快可以邁向國際上更多唔同地區，更上一層樓！」
